ნებისმიერი ონლაინ მაღაზიის მფლობელს სურს საკუთარი ბიზნესის წარმატებით განვითარება. ამ მიზნის მისაღწევად შეიძლება განსხვავებულ სტრატეგიებს ან მიდგომებს მივმართოთ. ხშირ შემთხვევაში, სხვადასხვა მიმართულების საკონსულტაციო კომპანიების და სპეციალისტების პროცესში ჩართვაც შესაძლოა ეფექტური აღმოჩნდეს, რაც რა თქმა უნდა საკმაოდ ძვირი სიამოვნებაა, თუმცა არსებობს ნაკლებად ძვირადღირებული ან სულაც უფასო ალტერნატივებიც, რომლებსაც საბოლოო ჯამში შთამბეჭდავ შედეგზე გავყავართ.  დღეს ბაზარზე მრავალი უფასო ინსტრუმენტია ხელმისაწვდომი, რომლებიც თქვენი ონლაინ მაღაზიის კონკურენტული უპირატესობის მოპოვებაში დაგეხმარებათ.

გიზიარებთ რამდენიმე საუკეთესო უფასო ხელსაწყოს, პლატფორმას ონლაინ მაღაზიის შედეგების გასაუმჯობესებლად:

Google Analytics

Google Analytics ყველაზე გავრცელებული ვებ-ანალიტიკური სერვისია, რომელიც ვებ-გვერდის მუშაობის ეფექტურობის შესაფასებლად გამოიყენება, იგი ვებ-გვერდზე განხორციელებული ვიზიტების შესახებ, სტატისტიკურ-ანალიტიკური ინფორმაციის შეგროვებასა და დამუშავებას უზრუნველყოფს.

აღნიშნული სერვისი ეკუთვნის გუგლს, რომელიც უფასოდ ხელმისაწვდომია ნებისმიერის პირისთვის,  ვისაც google-ის ან gmail-ის ანგარიში აქვს.

ვებ-გვერდი: https://analytics.google.com/

Canva

Canva ციფრული გრაფიკული დიზაინის პროგრამაა, რომელიც ორიენტირებულია სოციალური მედიისთვის განკუთვნილი ვიზუალური კონტენტის, მათ შორის გრაფიკის, პოსტერების, პრეზენტაციების, ბანერების და სლაიდერ ფოტოების, შექმნაზე. მის გამოსაყენებლად არაა აუცილებელი რაიმე საბაზისო ცოდნა გრაფიკულ დიზიანში. Canva მოიცავს მზა შაბლონებს, რაც კიდევ უფრო ამარტივებს სასურველ ვიზუალურ კონტენტზე მუშაობის პროცესს.

გარდა PRO და Enterprise ვერსიებისა Canva-ზე ხელმისაწვდომია FREE, ანუ უფასო ვერსიაც.

ვებ-გვერდი: https://www.canva.com/

Omnisend

თამამად შეიძლება ითქვას, რომ  ბაზარზე Omnisend ერთ-ერთი საუკეთესო ელექტრონული კომერციის მარკეტინგის ავტომატიზაციის ინსტრუმენტია. პლატფორმა საშუალებას გაძლევთ ავტომატური პილოტის მეშვეობით მართოთ გაყიდვები და მარტივად განსაზღვროთ სამიზნე აუდიტორია. Omnisend-ის მეშვეობით, თქვენ სწორი აუდიტორიისათვის რელევანტური პერსონალური შეტყობინებებისა თუ მეილების (ელ. წერილები) გაგზავნას, სწორ დროს, სწორი გაყიდვების არხების გამოყენებით შეძლებთ. საკმარისია ელ. ფოსტის არსებული შაბლონის თქვენს ბრენდზე მორგება, მისი გაგზავნის შემდგომ კი წარმატება გარანტირებულია!

ვებ-გვერდი: https://www.omnisend.com/

Facebook Pixel

FB pixel-ი ანალიტიკური ხელსაწყოა, რომელიც მიზნობრივი აუდიტორიის განსაზღვრაში გეხმარებთ, იგი მომხმარებელთა ინტერაქციის შესახებ იძიებს ინფორმაციას და საშუალებას გაძლევთ გამოიყენოთ სიგნალები, რომლებიც დაგეხმარებათ უკეთ გაიცნოთ თქვენი სამიზნე აუდიტორია, კერძოდ თქვენი აუდიტორიის ქცევები და პრეფერენციები. გამოდის, რომ თქვენ იმ ვიზიტორთა აქტივობის შესახებ ფლობთ მონაცემებს, რომლებიც თქვენს ვებ-გვერდს ესტუმრნენ, კალათში დაამატეს ან შეიძინეს პროდუქცია, ამ კვლევის შედეგების ცოდნის შემდეგ კი შეგიძლიათ რეკლამის სამიზნედ სწორედ პოტენციურ მყიდველები აქციოთ და მათი სახით  ერთგული მომხმარებლები შეიძინოთ, რაც წარმატებით აისახება სამომავლო სარეკლამო კამპანიებსა და საბოლო ჯამში თქვენს საქმიანობაზე.

ვებ-გვერდი: https://www.facebook.com/business/learn/facebook-ads-pixel

Hotjar

Hotjar-ი ვებ-გვერდის მოხმარების გამოცდილების ანალიტიკური ინსტრუმენტია. იგი ინდუსტრიის ერთ-ერთი წამყვანი, მარტივად მართვადი საშუალებაა მომხმარებელთა უკუკავშირის შედეგად მიღებული მონაცემთა ანალიზისთვის.

პლატფორმა კომპანიის ვებ საიტის ცალკეულ გვერდებზე მომხმარებლის ქცევის ერთობლიობაზე მიგითითებთ: სად აწკაპუნებენ და რას ათვალიერებენ კონკრეტულად თქვენი მომხმარებლები? რა აინტერესებთ მათ? კერძოდ რომელ მნიშვნელოვან ელემენტებს ნახულობენ გვერდზე და როგორ რეაგირებენ მათზე?

ვებ-გვერდი: https://www.hotjar.com/

Trello

აპლიკაცია Trello კომპანიებისთვის პროექტებისა, ამოცანების და დავალელების მართვის პროცესს ამარტივებს. ეს არის ვიზუალური ინსტრუმენტი, რომელიც საშუალებას გაძლევთ  ნებისმიერი ტიპის პროექტი მართოთ და სამუშაო პროცესისა თუ სხვადასხვა საკითხის მონიტორინგი უზრუნველყოთ. თქვენთვის საჭირო ყველა ინფორმაცია ორგანიზებულად ერთ სივრეცშია თავმოყრილი. ამასთანავე თქვენ საშუალება გეძლევათ გუნდის წევრები ვირტუალურ სამუშაო სივრცეში გააერთიანოთ - ამ ფორმით გასცეთ დავალებები, მოცემული დავალების შესრულების ვადები დანიშნოთ, კომენტარები დაურთოთ და სხვა.

ვებ-გვერდი: https://www.trello.com/